Museo Etnográfico y de Historia de Grado

Cultura tradicional rural, artesana y comercial

El Muséu Etnográficu y d’Historia de Grau dispón d’una colección d’alredor de 2.000 pieces orixinales que se pue visitar de baldre. Los sos espacios museográficos enseñen de manera visual, didáctica y entretenida la cultura tradicional de la contornada centro-occidental asturiana, dende la vida en mundu rural al comerciu y los mercaos de la villa. El Muséu fundóse en 1982 y actualmente estrémase en delles sedes y colecciones. Nel 2023 inauguráronse les sedes nueves Villa ya mercáu (Palaciu Fontela) y Llagar de Sidra (Palaciu Miranda-Valdecarzana).

SEDE PALACIO FONTELA

Inaugurada nel 2023, incluye la Colección Grau, Villa ya Mercáu, dedicada a la historia de la villa, el so mercáu tán popular, la so actividá comercial y industrial, y la vida burguesa; la Colección Historia de la Fotografía  (de Corsino Fernández) y la Colección Acordiones (de Felipe Rubial).

SEDE LA CARDOSA

Colección Cultura Tradicional

Dedicada a la vida rural tradicional del centro-occidente asturianu. La visita empieza cola cultura del pan, onde s’enseña la llabranza y collecha del cereal (escanda, trigu, centén y maíz) mostrando, ente otres pieces, mesories, un pisón de rabil y un molín hidráulicu. Sigue col llar, el sitiu de les cases tradicionales pa cocinar y onde s’esponen tamién oxetos pa facer el quesu afuega’l pitu o la mantega. Nel segundu pisu atópense máquines y oxetos rellacionaos cola artesanía y industria textil, el moblame tradicional de les cases del sieglu XIX y primeros del XX (sala-comedor, cuartu, aséu), la escuela colos sos pupitres, o l’espaciu agrariu y ganaderu con tolos aperios de la llabranza. La visita acaba con delles zones dedicaes a oficios: la fragua, el madreñeru, el goxeru, el carpinteru, etc.

Colección Guerra Civil

Creada en collaboración coles asociaciones ARAMA y Frente del Nalón, xébrase en tres espacios:

1. La Guerra Civil n’Asturies y Grau, incluye oxetos d’época, paneles introductorios, maquetes, semeyes, periódicos orixinales d’aquel tiempu, recreación de posición d’ametralladora y recreación puestu de mandu.

2. Fortificaciones, con paneles, troneres, maquetes…

3. Los dos bandos, onde se recrea la sanidá de campaña, emisora de radio, murueques del Cuartel de Simancas (Xixón), cocina de campaña, monolitos de la Lexón Cóndor, pieces d’época y pantalles táctiles con ampliación d’información.

SEDE PALACIO DE MIRANDA-VALDECARZANA (Casa de Cultura)

Inaugurada nel 2023, muestra dos llagares vieyos (de pesa y apretón) y otros oxetos antiguos pa la ellaboración y consumu de sidra.